[Up]

41a Esperanto Somerlernejo: Sabato 11a - vendredo 17a de augusto, 2001

Bonveno vin atendas!

La Barlaston-a somerlernejo eniras sian 41-an jaron en 2001. Memevidente, en
la dauro de kvar jardekoj multo sanĝiĝis, tamen la spirito de la pioniraj
sesioj restas (pri kiuj, parenteze, oni povas legi en la lastatempe aperinta
esearo Rubenaj refrenoj bazita sur prelegoj okazigataj en 2000 honore al 40
sinsekvaj somerlernejoj en Barlaston).

Tiu ĉi spirito kuŝas en la aparta etoso ĉe Wedgwood Memorial College:
spirito funde Esperanta, forte Esperanta; spirito, kiu insiste persiste
kreas pure Esperantan mondeton, tiel ke partoprenantoj, kiuj dum la unuaj
horoj en Barlaston nur hezite balbutas, havas la eblecon fine de la semajno
memfide sin esprimi en la internacia lingvo.

Tio signifas, ke staĝanoj en Barlaston, kiuj preferas uzi la anglan - kaj
ili malmultas - verdire ne estas tre bonvenaj. Tiuj, kiuj partoprenas la
somerlernejojn, gojas, ke dum tuta semajno ili povas liberigi de la angla;
ke ili uzas Esperanton ne nur en la klasĉambro - ekz. diskutante aktualajn
temojn - sed ankau en la manĝejo, en la arboriĉaj ĝardenoj ĉirkaŭ Wedgwood
Memorial College, vespere en la vilaĝa drinkejo, au ekskursante al loka
vidindaĵo, ekz. ceramikejo, muzeo au kastelo. Alivorte: oni plene merĝiĝas
en lingvo kaj kulturo Esperantaj, tiom ke krokodiloj, malhelpante al
'seriozaj' Esperantistoj, farigas en Barlaston bestoj minacataj.

Emfazata en Barlaston estas la ĉiutaga, parolata lingvo, kiun oni aŭdas pere
de prelegoj de spertaj Esperantistoj, kaj uzas kun aliaj staĝanoj. Tradicia
karakterizaĵo de la somerlernejoj estas la ĉeesto ne nur de eksterlandaj
partoprenantoj sed ankaŭ de eminenta, eksterlanda gastpreleganto (kiu ne nur
prelegas sed ankaŭ gvidas konversaciajn kaj aliajn sesiojn). Denove, pro la
partoprenado de eksterlandanoj, estas tre malĝentile paroli la anglan: alia
kialo por forigi krokodilojn!

Ne nepras tamen esti sperta Esperantisto por partopreni somerlernejon
(espereble, partopreninte, oni fariĝos spertulo!). Kvankam la staĝoj ne
celas komencantojn (por ili estas arangataj aliaj, pli konvenaj studrondoj
en Barlaston), tiuj, kiuj jam studis ĉefelementojn de la Esperanta gramatiko
sed al kiuj ankoraŭ mankas memfido paroli kaj sin esprimi, profitos de la
semajno ĉe Wedgwood Memorial College. Tiaj progresantoj eniras apartan
grupon en Barlaston kaj okupiĝas ja pri Esperantaj tekstoj kaj aliaj taskoj
sed ilin pritraktas ĉefe de gramatika vidpunkto: tiel ili akiras sperton kaj
memfidon por 'naĝi' en la vasta Esperanta oceano. Aliflanke progresintoj -
tiuj, kiuj jam bone regas la lingvon sed kiuj volas 'freŝigi' siajn lingvajn
konojn - konsideras gramatikajn nuancojn de la lingvo en la kunteksto tamen
de artikoloj politika, medioprotekta, naturscienca au literatura ĉerpitaj
ĝenerale el la revuo Monato.

Do oni laboras kaj oni ankaŭ sin amuzas, ĉu en la drinkejo, ĉu dum la distra
vespero, aŭ ĉu simple en la ĉeesto de aliaj Esperantistoj. La sukceso de la
Barlaston-aj somerlernejoj montriĝas en la fakto, ke jaron post jaro revenas
ja 'fidelaj' studantoj, al kiuj plaĉas la unika, (cer)amika etoso de
Wedgwood Memorial College. Tamen ankaŭ novaj vizaĝoj trovos bonvenon en
Barlaston: do, se vi neniam partoprenis unu el la famaj somerlernejoj, kaj
se vi volas profundiĝi dum tuta semajno en Esperanto (kaj, tro manĝinte, iom
dikiĝi . . . ), tuj aliĝu por mendi vian lokon. Bonveno vin atendas en
Barlaston!

Paul Gubbins